सदर योजनेअंतर्गत प्रशिक्षण घेण्यासाठी प्रशिक्षणार्थी किमान ७ वी पास असणे आवश्यक आहे. १८ ते ४५ वर्षया वयोगटातील व्यक्ती सदर योजने अंतर्गत प्रशिक्षणाचा लाभ घेऊ शकते. लाभार्थी कोणत्याही वित्तीय संस्थेचा थकबाकीदार नसावा.

या योजनेचा लाभ घेऊ इच्छिणाऱ्यांनी जिल्हास्तरावर जिल्हा उद्योग केंद्र कार्यालयाकडे संपर्क साधून प्रशिक्षण कार्यक्रमाबाबत माहिती घ्यावी. सदर कार्यक्रमांचे वेळापत्रक जिल्हास्तरावर जिल्हा उद्योग केंद्र कार्यालयाने ठरविल्याप्रमाणे घेण्यात येतात. सुशिक्षित बेरोजगारांना स्वयंरोजगारासाठी प्रवृत्त करण्याच्या दृष्टीने उद्योजकता प्रशिक्षण कार्यक्रम राबविला जातो. सदर प्रशिक्षण कार्यक्रमात मार्गदर्शक शिबिरे व प्रशिक्षण शिबिरे घेतली जातात. त्यामध्ये उद्योग / सेवा यांकरिता मार्गदर्शन देणे, जागेसंबंधी आवश्यक तरतूदी, प्रकल्प अहवाल तयार करणे, निरनिराळे परवाने मिळविण्याच्या पध्दती विक्रीकरिता आवश्यक बाबी इत्यादीबाबत उपयुक्त माहिती दिली जाते. या योजनेमध्ये महाराष्ट्र उद्योजकता विकास केंद्र, मिटकॉन व उद्योग संचालनालयाने मान्यता दिलेल्या अशासकीय कुशल प्रशिक्षक संस्थांमार्फत खालीलप्रमाणे प्रशिक्षण कार्यक्रम घेण्यांत येतात.

• उद्योजकता परिचय कार्यक्रम (१ दिवसीय, अनिवासी)

एक दिवसाच्या परिचय कार्यक्रमात व्यवसायाची निवड, उद्योजकीय व्यक्तिमत्व विकास, व्यवसाय व्यवस्थापन, शासनाच्या विविध संस्था व अर्थसहाय्य देणा-या संस्था व यांच्यामार्फत राबविल्या जाणा-या योजनांची माहिती दिली जाते. प्रति प्रशिक्षण कार्यक्रम ₹ ६००/- खर्च राहिल.

• उद्योजकता विकास प्रशिक्षण कार्यक्रम (१२ दिवसीय, निवासी)

सदर प्रशिक्षण कार्यक्रम १२ दिवसांचे, निवासी व भोजन व्यवस्थेसह आहे. उद्योजकता परिचय कार्यक्रमात निवडलेल्या प्रशिक्षणार्थ्यांना उद्योगाशी संबंधित कलागुणांचा विकास व माहिती मिळण्याचा प्रशिक्षणात प्रामुख्याने समावेश आहे. प्रति प्रशिक्षणार्थी ₹ ४०००/- संस्थेस देण्यांत येतात.

• तांत्रिक प्रशिक्षण कार्यक्रम (१५ दिवस ते २ महिने अनिवासी)

या प्रशिक्षण कार्यक्रमात उत्पादन/सेवा उद्योगांशी निगडीत तांत्रिक प्रशिक्षण देण्यांत येते. हे प्रशिक्षण अनिवासी असून प्रशिक्षणार्थीस १५ दिवसांकरीता ₹. ५००/- आणि दरमहा ₹. १०००/- तसेच २ महिन्यांच्या प्रशिक्षण कार्यक्रमासाठी ₹.२,०००/- विद्यावेतन देण्यांत येते तसेच प्रति प्रशिक्षणार्थी प्रतिमहा ₹. ३०००/- संस्थेस देण्यांत येतात